آآآآآآآ....ه ياالدنيا

آآآآ...ه يا دنيا وين رايحا بيا* خداعة من بكري عنها قالو
كنت  نمتع  بطني بالمقروط والزلابيا* وصرت نخاف من كل حلوا وفعالو
نخاف يطلعلي السكر  ويمرر عليا* ويثقل عقلي وقلبي باحمالوا
الميزان ثقل  والبارود يتكلم مساميا !!!!!* مرة نجري ومرة نصد  نوقف قبالو !!!
مرة سبع  و حاجتي مقضيا* ومرة  تراس   مانشبه لوالو !!!
مرة درويش ماشي بالنية*ومرة  شيخ زهمر  عقلو  دلالو
حال الشيوخ والعجايز في الدنيا* من عقوق الوالدين والكناين قوالو
الله يرحلنا رحول العافيا *قالوها لولين كيماقالو
من خوفهم من الرمية وقلة الحيا*والزلزال الحق لستة وثمنية ومازالو
غضب ربي والكون والأنبيا*والصالحين  في قبورهم يسقسو ويسالو 
ومرة صغير نلعب مع الذرية* ولادي زوج والثالث في حالو
ومرة كبير هايم في الدنيا *نخالط الشيوخ ونسمع واش قالو
ومرة نتوه مانعرف راسي من رجليا*نمشي  وفوق راسي  صباط بقفالو!!!!!  
ومرة راجل  واقف قد المسؤولية* وحر بالغمزة  وميزاني بأرطالو
لا ظالم لا مظلوم وصرفي معايا*والحديث قياس عني إذا سالوا
ومرة طايح  و محايني مساميا* متكسل ممدود والليل يحلالو
نحل ونحلل من قضية لقضية* وحليل القاضي  العادل في حكموا و قوالو
نغوص فيها  ونحاورها بالعقلية* وتسهل مرات و تمهل كيوالو
ومرات تتعقد وتصعب عليا* والرقاص  يبطى والساعات يطوالو
والصبر معايا  ويعاون فيا* مرة يبكي ومرة زهيالو
نستغفر  ونصلي ركعات  لمولايا* وندعي ربي جل جلالو
مابياش أنا  هذي حوال الدنيا* وحليل  المسكين ربي يلطف بحالو
نعمل بالقرآن  سورة وآية*غافر و الترتيب ستين من أقوالو
ماهو لا شعر ولا وحي عليا* والحامل جبريل  لمحمد هدالوا
يهدي الخلق والنفس الضالة بيا* والصلاة على محمد وآلو