ضاقت روحي وطال الحال بيا* ماعرفت أعلاه خاطري تخلطت أحوالو
اللي نصاحبو يفر هارب اعليا* تقول في جناحي عقارب ولا واش صرالو!
ولا تقول ناقل الجمر في يديا* اللي نقرب ليه يتبدل حالو
هذا الزمان تخلطت فيه الحيلة بالنيا* والقباحة ولات عادي ! و مافبها والو !
الكببر في السن قال رانا في بليا* راح الحياء واللقدر عليهم نسالو !
يدعي ربي نرحلو رحول الأوليا* رحول العافيا والجنة اقبالو
آآآآآآآآمين ربي يستجيب ليهم وليا* وياسعد اللي فاز في الآخرة بأفعالو
الي اكسب اليوم كامل الأرض والدنيا* بعد لحظة يموت كاللي ماكسب والو
باه نفعو الفاني اللي يروح في ثانيا* خل كل شيء وراه وجاهو ومالو
اللي بعقلو يتبع طريق ربي والأنبيا*
واللي قلبو مات يجيه نهار يفوق من اهبالو
واحد يوم عند ربي كالأف عام في الدنيا* والعلاما صرحو وفيها قالوا
واحد يوم عند ربي بخمسين ألف سنة في الدنيا* وأهل العلم فكروا و صدقو أقوالو
قالو الكون اخلق في اقل من ثانيا* وكاين اللي مازال ماعرف ويناه ولا وشحالو
قالو احسابنا كحساب عزوج نايليا* اللي عمرها ماقرات وما شافت والو
الكون في اتساع ساكن في العليا* والزمان الصحيح تغيرت اطوالو
قالو رانا غير انقربو في النظر والنظريا* واللي عندو أخبر اديرنا في بالو
عمرك ياإنسان أقل من واحد على ميا* سقسي ربي خالق الكون وأشكالو
امشي ولا اجري اورا الدنيا الفانيا* والله مايصحلك منها غير القبر وأهوالو
اميمتي نفديها بروحي و بعينيا* ونهزها على اكتافي يبلغ جمالو
وصايت ربي وحقها بلا مزيا* وربي يحفضنا من الحاسد وضلالو
عندها الحق حتى وتدفل عليا* قدام ربي والناس إذ سالو
وين نروح إذا غابت ميمتي عليا* وإذا غبت عليها قلبها تثقل احمالو
وتلوم روحا واللوم عليا* و تبط لسانها وتلومو على أقوالو
نداوس روحي وندير قلبي في يديا* ونزيد فيه ذراع يتحسن حالو
مايحس بالهموم ومحاين الدنيا* ولابد من يوم يجي أجالو
سنة الحياة وقاعدة اساسية * كاين اللي ماتو وكاين اللي مزالو
النفس نفسين رايحة وشقيا* ويوم القيامة يلقى كل واحد عملو اقبالو
ربي عالم بالظاهرة والمخفيا* مايظلم عبدو ما تتحشالو
صدق ودير الخير بحسن النيا* في خاطر ربي وعلى جالو
ماتمني مادقول درت ذيك وذيا* كاللي يذري في الريح زرعو ومالو
كل مرة عاود و جدد النيا * اذا عينك في السبول والسيقان يطوالو
اللي عينو في القلة تجيه كاملة ومستويا* مرة على مرة يسقيها مافيها والو
الحياء واللقدر راحو مع البرنوس والزربيا* وجا الوقت المكشوف بزبالو
أعوذ بالله من النفس المكارة والحيلييا* واستغفر الله جل جلالو
ربي يغفر ويسمح ليكم وليا* والله ينعل الشيطان وسلالو
والصلاةعلى النبي محمد نور وهديا* شفيعنا يوم المحشر وزلزالو
Aucun commentaire:
Enregistrer un commentaire