وشعب الجزائر من لجدود للحفاد*خاوة وبن عم ماتكونوش جوهالة
خيرو من سبوعكم واحد صياد* الرجلة والنيف ماهوش من والة
مول كلمة ما يخدع مايخلف ميعاد* ماتهزو لرياح ماتحولو لحثالة
في الشدة تلقاه و الغبنة ولعياد* كي الصاحب الرفيق في الدنيا البهدالة
يخطف خطفة كي الطير الصياد* فوق السما مدرب يهجم قبالة
وين تلوحو تلقاه واقف قداد* و حديثو اممضيه ودمو يتقالة
خيرو شعبو يزدم ويقرص على الزناد* من الف سلطان دالة بدالة
للرئاسة مرسولنا جايها يخدم لبلاد* حقولو مورادو وأهل الحق عوالة
تعوذوا من الشيطان برب العباد* واجتمعو على الحق كونو رجالة
حاربو الفتنة الجيفة كونو أسياد* ولموا هذا الشتات رانا في حالة
رانا ولينا كي ارم ذات العماد* مانفع فيهم لا كتاب لا رسالة
اترباو على الكفر والفتنة ولحقاد* وحاربو الحق وأصحابو دالة بدالة
ياناس تفكروا ذوك لقوام قوم عاد* بدلو الخير بالشر وحاربو العدالة
يا شعب الجزائر أهل الخير والسداد* وين كباركم وين فرسانكم والخيالة؟
وينهو عطية وولادو ولحفاد* ولا كي النكوة تبدلت الحالة؟!
يا ولادعطية يا أهل لجهاد* تعرفكم لعروش والناس القوالة
وينهو سيدي نايل و أهلو الزهاد* يادرا سمعوني ولا لالا؟
رانا في غلبة يا صلاح لبلاد* النية خابت في النسا والرجالة
ماعرفت نهدا ولا نرحل من البلاد* ولا نصوم لكلام مانقول لا إيه لا لالا !!!!!!
القلب اتعمر واللمحاين في تعداد* و الكرش كولات ومن لباسر راني في حالة
بن عبد الرحمان نظم وقرص على الزناد* وشانك يا بارود تقدرو الفرسان والرجالة
وصلو على الرسول خير العباد* الهادي للنور بعد الضلالة
Aucun commentaire:
Enregistrer un commentaire