بسم الله بديت وفي كلامي عبرة* والصلاة على النبي العدنان
الفساد مخيم داير سهرة* في فرنسا و دزاير والمااريكان
بكمشة وحفنة تباعت الحرة* الدزاير ودينارها بأرخس الأثمان
والشباب مقهور يخمم في الهحرة* لاثيقة في المسؤول ولا في البرلمان
هارب من الجحيم والعيشة المرة* والظلم و انواعو أشكال وألوان
في ضراط راسو ! الغربة وردة حمرا* ومسك الليل وراحة وأمان!!!
يعارك في البحر وأمواجو صخرة* وكاين اللي ماتو طعام للحيتان
قالو ياكلنا لبحر خير من الحقرة* والظلم والتهميش والعدل بلا ميزان
بعض المسؤولين يصلو لظهرة !* مع بنات الليل والزطلة والديفان
الحقوق مثمنة بالرشوة الصغرى!* والكبرى ! في السرير مع صحابو عريان!
الدستور يبدأ بسم الله خطرة* والشعب والجزائر راهم حران
مسطر و مكتوب و مبصوم بالعشرة!* ديننا الإسلام و اللغة لغة القرآن
والعدالة باه تحكم يا حصرا* بالدستور وموادو او بالهاتفان؟
الأرضي مشغول على الشعب عورة! * و انتاع الجيب اللي جيبو مليان
اهدينا ياربي رانا في حيرة * سرقت منا اعوام ضاعت بلاحسبان
ربي خير من كل زريعة مرة* ومحمد نورنا والسنة والقرآن
ينعلهم الأحزاب خاوت الكفرة* كبني صهيون في الفعل والخزيان
ماهم انتاع ربي ولا للشعب مرة* والنفاق والكذب خاوت الثعبان
البدلات ألوان والضحكة الصفرة* دقول هذوصحابي ندير فيهم لمان
يدزو في الرئيس لخامس خطرة* وبوتفليقة غاطس في صحتو تعبان
يلعبوا بينا حاسبينا قوم امراة* او نرضعوا في اصباعنا كالصبيان
بدلوا الشعب والدين بكوش انتاع الخرا!* وتعودو على النفاق والبهتان
كي تعجنهم مايجوش في صاق العدرة* اميمتي الحنانة نور وبرهان
رن رن يالقصاب وعاود الجرة* وكلامي موزون ب رن الميزان
ابكات عيني وزادتني الأخرة* وتنفخو بالدموع صارو ويدان
اتفسخ قلبي ولا كالجمرة* مانيش اصم ولا من العميان
يحكمن فعل مضارع مبني على دورة! * لإتصالو بكيفو بنون النسوان
ونون النسوة فاعل والراجل اصبح امراة* مبني على الفتحة ضمير البهتان
العقل ذرة و الفريسة بقرة* والقلب معدوم ميت منذ زمان
كان الشعب يرتل سورة بسورة* و رجعت هند تحكم في ابو سفيان
والمواطن عياش حاصل في حفرة* وهذي ست ايام ومازال مابان
حالو حال الشعب يعكس الصورة* وكتاب التفسير وقاموس لمعان
وينهي الكوبتيرات والوسائل المشهورة* ولا محضورات على الشعب العريان؟!!!
ماهوش بن مسؤول ياميمتو المحقورة* ماهوش بن سراق ولا باباه طحان
بح صوتو وصداه لم الشعوب المجرورة* وتلمو لحباب كجملة الديوان
واعتذرت لحزاب والحكومة البقورة!* والرئيس من بكري لاخبر لا عنوان
يكثر خيرهم كيلحقهم الصوت والصورة* بعثولو مع الفكرون بيوش وبالا ماريكان !!!!
وينهو النيف وينهي ذيك الصورة* كيكانت للجزائر هيبة وميزان
الخبز والماء يابوقندورة!!!- * وراسك في السماء لا ضايع لامهان
ندعوا ربي ينصر الشعوب المقهورة* ويحميها من الظلم والطغيان
وربي يشفي لجسام المضرورة*ويطلق صراح المظلومين والمواطن عدلان
الحمد لله في اول سورة* وبقل هو الله نختم الفرقان
والصلاة على خير ما ولدت امرا* محمد نبينا اجمل إنسان
Aucun commentaire:
Enregistrer un commentaire