ألو ألو راني بعثت الرقم والفاتورة* ردو عليا راه صوتي بح والقلب تعبان
وينهو النيف وينهي ذيك الصورة* كيكانت للجزائر هيبة وميزان
الخبز والماء والنيف و480في الصرة !!! * وراسي في السماء لا محقور لامهان
العصابة المافيا شوهت الدين والقندورة!* تتقرب لدبغول وماكرون الطحان
واش يجيك من حلوف وخنزيرة!!* في الزيقوا عايشين لا نيف لا إيمان
الويسكي والبيرة و كه كه في الصورة* والزطلة وماكرون يسربي مع الشيطان!!!!
لا عقل لا دين لا فكر لا بصيرة* مع الصهاينة تحالفوا على الجزائر والجيران
راهم يحلموا مع الماك المغرورة!!!* الراس يضرط و العقل خاوي وجيعان!
حاسبين الجزائر وحيدة ومحقورة* ويداولو يقسموها كالسودان
الجزائر حرة وبرجالها مستورة*
والشعب من صيل لفحولة والشجعان
يا غافل الدنيا كتاب وسبورة* أقرأ واحفظ وكيل بكلام ميزان
وعندك تنسى السبحة والقندورة* وصحا فطورك إلا راك صائم رمضان!
صلي وسبح واقرا آية من كل سورة* واذا اقدرت أختم القرآن
يا بن الجلفة ذيك البقعة المحقورة* وجارتها بوسعادة وامجدل ومناعة العنوان
وروح للمسيلة ولبسكرة دير دورة* واركب لبن سرور و لباتنة أرض الفرسان
ولغرداية تفكرك في مفدي بالصورة* والشعر المطروز كلام وبيان
ودهمي تندوف و ذيك الصحرة المخزورة* و اشرب كأس اتاي مع الرجالة الشجعان
و اخطف خطفة لتيزي وزو وبجايا المشهورة* بزيت الزيتون ولجبال والويدان
وطل على الغرب وشطوطوا المنثورة* وكحل عينك في الزاهية وهران
وأقصد العاصمة الباهية المذكورة* بلاد الصالح سيدي عبد الرحمان
وطير ياطير لندن بالعدالة مشهورة* و ابعثلي قشبية راني في فرنسا قويان!
وسال على جلول ! وأكتبلوا في السبورة*
خاوا خاوا والنيف ماضي والدم حامي و بركان
Aucun commentaire:
Enregistrer un commentaire